ඉස්සර ඇය ගැන නිතරම කතා කළා. නමුත් දැන් ඇය ගායිකාවක් විදිහට දකින්න නැති නිසා ඇය ගැන බොහෝ අය කතා කරන්නේ අඩුවෙන්. ලොකු වියදමක් දරලා විවාහ උත්සවය ගත්ත නතාෂා පෙරේරා විවාහ ජිවිතේ ගැන පුවත් පතකට මේ විදිහට කතා කරලා තිබුණා.
නතාෂා ඉතින් කොහොමද ජීවිතේ?
ජීවිතේ හොඳයි. නීතිඥවරියක් විදිහට 2015දී මම දිවුරුම් දුන්නා. ඉතින් දැන් මගේ වෘත්තියත් එක්ක තමයි කාර්යබහුල වෙලා තියෙන්නේ.
ප්‍රිහාන්ගෙයි ඔයාගෙයි ජීවිතේ කොහොමද?
අපි දෙන්නගේ ජීවිතේ හොඳයි. අපි දෙන්නා විවාහ වුණේ 2015 මැයි මාසේ. අපේ විවාහයට දැන් අවුරුදු දෙකක් ගතවෙන්නත් ළඟයි. ඉතින් මේ අවුරුදු දෙක තුළ බොහෝම සාමාන්‍ය සරල ජීවිතයක් ගතකරමින් අපි දෙන්නා සතුටින් ජීවත් වෙනවා.
විවාහවුණු අලුත් නතාෂායි ප්‍රිහානුයි ජීවිත්වුණේ ප්‍රිහාන්ලගේම ගෙදර නේද?
ඔව්… විවාහ වුණු මුල් කාලේදී අපි ප්‍රිහාන්ගේ ගෙදරමයි ජීවත් වුණේ. ඊට පස්සේ අපි ටික කාලයක් පිටරට ගිහින් ගිටියා. දැන් අපි වෙනමම ගේක තමයි ජීවත්වෙන්නේ.
කොහොම ඔය දෙන්නා ඔයාලගේ වැඩ, ගෙදර වැඩ එහෙම කරන්නේ. ප්‍රිහාන් එහෙමත් ඒවාට උදවු කරනවාද?
දැන් අපි ඉන්න ගෙදරට ඇවිත් අවුරුද්දක් විතර වෙනවා. ගෙදර වැඩවලට අපිට උදව්වට කෙනෙක් ඉන්නවා. හැබැයි ගෙදර වැඩ බොහෝමයක් වෙන්නේ මගේ අතින්. ඒ හැම දෙයක්ම හොයලා බලලා කරන්නේ මමයි. ප්‍රිහාන්ගේ ව්‍යාපාරික කටයුතු නිසා එයා මටත් වඩා කාර්යබහුලයි.
ඒ කියන්නේ ප්‍රිහාන් උදව් වෙන්නෙම නැද්ද?
මෙහෙමයි එයා උදව් කරනවා. හැබැයි එයාට වැඩ වැඩියි. සමහර වෙලාවට අපි දෙන්නට කතාකරගන්නවත් වෙලාවක් නැති තරම්. ගෙදර වැඩ ගැන ඉස්සර මම දැනගෙන හිටියේ නෑ. ඒ හැම දෙයක්ම දැනගත්තේ විවාහ වුණාට පස්සෙයි. ප්‍රිහාන්ගේ වුණත් මුලදී ඒ දේවල්වලට ලොකු සහයෝගයක් ලැබුණා. ඊට පස්සේ ඒ හැමදේටම පුරුදු වුණාට පස්සේ දැන් ඒක අපිට ගාණක් නෑ. විවාහයත් එක්ක තමයි මම හැමදෙයක්ම ඉගෙන ගත්තේ. ප්‍රිහාන් ගෙදර ඉන්න වෙලාවට උදව් කරනවා. හැබැයි දැන් මම එහෙම උදවු බලාපොරොත්තු වෙන්නෙත් නෑ. මොකද එයා මහන්සිවෙලා එන නිසා.
ප්‍රිහාන් කියන්නේත් ගායන ශිල්පියෙක්. ඔබත් ගායන ශිල්පිනියක් දෙන්නා එකතුවෙලා අලුතින් නිර්මාණයක් කරන්න අදහසක් නැද්ද?
එහෙම අදහසක් තිබ්බා. තාමත් තියෙනවා. ඒ නිසා අපි කොහොමත් හිතාගෙන ඉන්නේ ප්‍රිහාන්ගේ සින්දුවක් හරි මගේ සින්දුවක් හරි දෙන්නගෙම සින්දුවක් හරි මැයි මාසය අගදිවත් කරන්න තමයි. ඒකට සූදානමකුත් තියෙනවා. හැබැයි ඒකට ලොකු හදිස්සියක්වත්, බලාපොරාත්තුවක්වත් තිබුණේ නෑ. ඒකයි මෙච්චර කල් ඒකත් පහුවුණේ. කිසිම දේකට අපි දෙන්නා හදිසි වෙන්නෙ නෑ.
නතාෂා බුද්ධාගමේ. ප්‍රිහාන් කතෝලික. කොහොමද ඔය දෙන්නා ආගම දහමට තියෙන ළැදිකම?
ප්‍රිහාන් ගොඩාක් එයාගේ ආගමට ළැදි කෙනෙක්. මටත් ඒ ළැදියාව සෑහෙන්න තියෙනවා. ඉතින් මම අවුරුදු පහක් තිස්සේ එයත් එක්ක පල්ලි යනවා. ඒ වගේම මම ඉස්කෝලේ ගියේ බම්බලපිටිය ශුද්ධ වූ පවුලේ කන්‍යාරාමයට. ඒක කතෝලික ආගමට හැඩගැසුණු පාසලක්. ඉතින් මම කතෝලික ආගමේ ලොකු පසුබිමක් පුංචි කාලේ ඉඳන්ම තියෙනවා. ඒ නිසා ප්‍රිහාන් එක්ක විවාහ වීම ඒකට අලුත් දෙයක් නෙවේ. මම හැම ඉරිදම පල්ලි ගිහින් යාඥා කරනවා. රෑට නිදාගන්න කලින් යාඥා කරනවා. අපි දෙන්නා විවාහ වුණෙත් පල්ලියේ. මම උප්පත්තියෙන් බෞද්ධ. හැබැයි පෝයදාට කියලා පන්සල් යන්නේ නෑ. පුළුවන් වෙලාවට පන්සල් යනවා. ගෙදර පිරිත් අහනවා.
නතාෂායි ඔයාගේ අම්මයි අතරේ ලොකු බැඳීමක් තිබ්බනේ. වෙනම නතාෂා අලුතින් ජීවිතයක් පටන් ගනිද්දී ලොකු දුකක් ඇති වුණා නේද?
හැමදේටම මට හිටියේ මගේ අම්මි. එළියට ගියත් ගෙදර හිටියත් මට හිටියේ අම්මි. නමුත් විවාහයෙන් පස්සේ ඒ ජීවිතයට හුරුවෙන්න මට අමාරු වුණා. ඒ හැමදේම වෙනස් වුණා. ජිවිතේ අලුත් වුණා. වෙනස් වුණා. ඒක අමාරු වුණා. තනි තීරණයක් හිතලා ගන්නවත් අමාරුවකයි මම හිටියේ. ඒ වගේම තමයි මගේ අම්මිටත් මම නැති පාළුව ලොකුවටම දැනුණා. ඉතින් අදටත් මට යන්න පුළුවන් හැම මොහොතකම මම එහේ යනවා. අම්මි මෙහේ එනවා. නමුත් ඒ පාළුව තාමත් මට නැතිවෙලා නෑ.
නතාෂා විලාසිතාවලට මේක්අප්වලට ආසයි නේද?
මම ගොඩාක් වෙලාවට කැමැතියි මගේ කොණ්ඩේ පාට වෙනස් කරන්න. හැබැයි විලාසිතා කියලා ඇඳුම් පස්සේ යන එක මම සෑහෙන්න අඩුයි. මම ගැන එක එක්කෙනා එක එක කතා කිව්වට රූපලාවන්‍ය කටයුතුවලට තරම් අඩු වියදමක් නෑ වෙන කිසිම දේකට. මම ඒ තරමටම ඒ දේවල්වලට වියදම් කරන්නේ නෑ. මගේ ලොකුම ආසාව තමයි කොණ්ඩේ පාට කරන එක. ඒක තමයි මගේ විලාසිතාව.
දැන් අවුරුදු දෙක්ක පිරුණනේ. ආදරණීය අම්මා කෙනෙක් වෙන්න කාලය හරිද?
අපි ඒ ගැන සැලසුම් කරලවත් නෑ. අපි විවාහවෙලා අවුරුද්දක් හිටියේ පිටරට. ලංකාවට ඇවිත් තාම ලොකු කාලයක් නොවේ. ආපු කාලය තුළදි අපිට එහෙම ස්ථාවරයක් තිබුණෙත් නෑ. ප්‍රිහාන්ගේ ව්‍යාපාරය නිසා කාර්යබහුල වුණා. මම මගේ වෘත්තිය හදාරන්න කාර්යබහුල වුණා. බලමු… අවුරුදු දෙකක් කියන්නෙත් ලොකු කාලයක් නෙමෙයිනේ.
