Hari Nef ඇමරිකානු රංගන ශිල්පිනියක, නිරූපණ ශිල්පිනියක හා ලේඛිකාවකි. ඇය මේ වනවිට 24 හැවිරිදි වියේ පසුවන්නීය. ලිංගික විපර්යාසයට ලක්වූ Nef, ඇය වැනිම වූවන් වෙනුවෙන් හඬ නගන්නීය.
මේ ‘The Interview’ සඟරාව සමගින් එක්වූ ඇය දැක්වූ අදහස් වලින් කීපයකි.
ඔබේ වෘත්තීය ජීවිතය ගැන පැහැදිලි කළොත් ?
මම රංගන ශිල්පිනියක, මෝස්තර නිරූපිකාවක හා සමාජ ක්‍රියාකාරිනියක විදියට හදුන්වන්න පුළුවන්. මා සමාජ ක්‍රියාකාරිනියක ලෙස හඳුන්වන්නට කලියෙන් මාධ්‍ය මාව සමාජ ක්‍රියාකාරිනියක විදියට හැඳින්වූවා. ඒ ගැන මුලින්ම මට තිබුණේ තරමක සැකයක්. මා හිතුවේ ‘ඉතිං, මම සමාජ ක්‍රියාකාරිනියක නොවෙයි. මම නිකම්ම නිකං ලිංගික විපර්යාසිකයකු පමණක් බවයි‘
මගේ වෘත්තීය ජීවිතයෙන් ඉහළට යද්දී මා ඇතුළු ලිංගික විපර්යාසිකයින්ට එල්ල වන බලපෑම් ගැන කතාබහ කරන්න පෙළඹුණා. උදාසීනකම කියන්නේ කවදාවත් විකල්පයක් නොවෙයි – තමන් ගැන උනන්දු වීම හා පරාර්ථකාමීත්වය කියන්නේ එක හා සමාන දෙයක්. මා, මා වැනිම වූවන්ට උපදෙස් දෙනවා. ඒ කියන්නේ මා මටම උපදෙස් දී ගන්නවා වැඩක්.
ඔබට මේ මොහොතේ තිබෙන දැවැන්තම අභියෝගය කුමක්ද ?
මා ලිංගික විපර්යාසයට පත්වූ කෙනෙකු වීමම මගේ ජීවිතය තුළ මුහුණදීමට සිදුවී තිබෙන දැවැන්තම අභියෝගය බව බොහොම විශ්වාසයෙන් යුතුව කියන්නට හැකියි. මා ලිංගික විපර්යාසයට පත්වූවෙකු වීම හුදෙක් ගැටළුවක් පමණක්ම නොවෙයි. සමාජයේ අපහාසයට ලක්වෙන, ගැරහුම් ලබන තත්ත්වයක්. සමාජය මේ ගැන අවබෝධ කරගන්න වත් උත්සහ කරගන්නේ නැහැ.
මීළග වසර පහ තුළ මේ සම්බන්ධයෙන් සිදුවිය යුතු වෙනස්කම් ලෙස ඔබ විශ්වාස කරන්නේ මොනවාද ?
අපේ වෘත්තීන් හා ගෘහ ජීවිතය තුළදී අපිට විඳින්නට සිද්ධවෙන වෙනස්කම් වලින් විශ්වීය වශයෙන් ආරක්ෂා කිරීමට සමත් නීති සකස් විය යුතුයි. අපේ ජීවිතය ආරක්ෂා කරන වෛද්‍යාධාර වලට නොමිලේ පිවිසීමට වගේම අපේ ලිංගිකත්වය නීත්‍යනුකූල කිරීමටත්, අපේ ලිංගික අනන්‍යතාවය අනුව පිවිසිය හැකි විවේකාගාර වලට පිවිසීමටත් අපිට හැකිවිය යුතුයි. අපි ආදරය කරන අය සම්බන්ධයෙන්, වෙනත් සමීපතමයින්ගේ වෛරයට ලක්නොවීමට ඔවුන් සමග ආරවුල් ඇතිකරනොගැනීමට හැකිවිය යුතුයි.
ඔබේ ජීවිතය තුළ අත්පත්කරගත් සුවිශේෂී ජයග්‍රහණ මොනවාද ?
පසුගිය වසරේදී කොළොම්බියා සරසවියේ ‘නාට්‍ය හා කලා අංශයෙන්‘ උපාධිය හිමිකරගන්නට මට හැකිවුණා. ඒත් සමගම ඉතිහාසයේ පළමුවරට ලිංගික විපර්යාසයට ලක්වූ තැනැත්තියක ලෙස ලෝ ප්‍රකට IMG සමාගම සමගින් නිරූපණයේ යෙදෙන්න ගිවිසුමකට එළඹිමේ භාග්‍යය මට හිමිවුණා. රූපවාහිනී නාට්‍ය හා සම්බන්ධ වීමේ අවස්ථාව, මිලාන් වල පැවතුණු Gucci විලාසිතා දැක්මට සහභාගී වීමේ භාග්‍යය හිමිවුණා. National Center for Transgender Equality [transequality.org] හි නියෝජිතයකු මෙන්ම උපදේශකවරියක ලෙස ද කටයුතු කරනවා.
මේ සියලු ජයග්‍රහණයන් හමුවේ මා ලැබූ දැවැන්තම ජයග්‍රහණය වුණේ මගේ සැබෑ ස්වරූපයෙන් දිවිගෙවීමට හිමිවුණු අවස්ථාවයි. ඔබ ලිංගික විපර්යාසයට ලක්වූවෙකු නම්, ඔබේ ජීවිතයේදී නිතරම පිළිතුරු දීමට වුවමනා වන ප්‍රශ්නයක් කවදාවත් නොනැසී පවතිනවා. මා මෙතෙක් කළ අසීරුතම කටයුත්ත වුණේ ඒ ප්‍රශ්නයට ආදරයෙන් හා විශ්වාසයෙන් යුතුව නැවත නැවතත් පිළිතුරු දීමයි. ලිංගික විපර්යාසය දුෂ්කර වුණත් එය අතිශය සොඳුරුයි.
