අපේ ක්රිකට් කණ්ඩායම නියෝජනය කරන සුපිරි ක්‍රීඩකයෙක් තමයි තිසර පෙරේරා කියන්නේ.
තිසරගේ පාසල් කාලය, ආදරය වගේම තවත් බොහෝ දේවල් ගැන තිසරගේ ආදරණීය බිරිඳ ෂෙරමි දිනුෂිකා පෙරේරා සතිඅන්ත පුවත්පතකට මේ විදිහට හෙළි කරලා තිබුණා.
ඒ කාලෙද මේ කාලෙද වැඩිය හොඳ
හතර වසරේ ඉඳන් අපි දෙන්නා යාළුවෝ. ඕලෙවල් පංතියේදී තමයි ආදරේ කරන්න පටන් ගත්තේ.
පෙම්වතුන් වෙලා හිටපු කාලෙට වැඩිය විවාහයෙන් පස්සේ හොඳයි කියලා හිතෙනවා. එතකොට දෙපැත්තකනේ හිටියේ. දැන් හොඳයි. දැන් අපි දෙන්නට අපි දෙන්නා ළඟ ඉන්නවානේ.
ගෙදර වැඩවලට ලබාදෙන සහයෝගය
ගෙදර හැමදේම ගැන ගොඩක් හොයලා බලනවා. මං බැලූවේ නැතත් එයා බලනවා.
ගෙදර කාලය ගත කරන්න එයා හුඟක් කැමැතියි. ගෙදර ඉන්න වෙලාවට හැමදේම හොයලා බලලා කරනවා. ගෙදර තියෙන ෆර්නිචර් වුණත් පරණ වුණාහම එයා තමයි කියන්නේ දැන් මේක පරණයි මාරු කරමු කියලා.
ගෙදර තියෙන හැමදේම වගේ එයා ඩිසයින් කරලා එයාම සකස් කරවපු දේවල්.
ෂෙරමිට උදව් කරනවද
උදව් කරනවා කියන්නේ ඔම්ලට් එකක් වගේ දේවල් හදලා දෙනවා.
ඔම්ලට් එක හදන්න දන්නවා. ඒක රසට හදනවා. වෙන මුකුත් නං දන්නේ නෑ. අපි ඉතිං ගොඩක් ගෙදර ඉන්න දෙනවත් අඩුයිනේ. එයාට පුළුවන් විදිහට උදව් කරනවා.
තිසරගේ අකමැතිම ගතිගුණය
එහෙම නෑ ඉතිං. ගොඩක් නරක ගති එයා ළඟ නෑ.
ටිකක් හරි තරහ යන්නේ පාරේ වාහනය පදවද්දී අනිත් අය වැරදි දෙයක් කළොත් ඔන්න ටිකක් තරහ යනවා. ඒ වගේ දේවල් වලට තමයි ඉතිං තරහ ගියත්. ගෙදර අය එක්ක නං තරහ යන්නේ නෑ.
තිසරගේ විලාසිතා
ෂෝපින් කරන්න ගියහම අපි වගේ ෂොප් දෙක තුනකට යන්නේ නෑ.
එයා ආස බ‍්‍රෑන්ඩ් එකක් තියෙනවා නම් එක සැරේ එතැනට ගිහිං ගන්නවා. එයා ආස බ‍්‍රෑන්ඩ් කිහිපයක් තියෙනවා. ඒවාට හරිම ආසයි. ඒවම තමයි ගන්නේ. සාමාන්‍යයෙන් විලාසිතා වලට කැමැතියි.
කේන්ති ගියහම කොයි වගේද
එයා ඒ වෙලාවට කතා කරන්නේ නෑ. කේන්ති ගියහම සද්ද නැතුව ඉන්නවා. හැබැයි උපරිම පැය භාගයක් ඉඳීවි. එච්චරයි. ඊට පස්සේ නිකන්ම කතා කරනවා.
දුක හිතුනම
විශේෂයක් නැහැ. මොකද කිසිම දෙයක් එයා වැඩිය හිතට ගන්නේ නෑ.
වැඩිපුර ලැබුණා කියලා ඒක හිතට අරන් හුඟක් සතුටු වෙන්නෙත් නෑ” දෙයක් නැති වුණා කියලා හුඟක් දුක් වෙන්නෙත් නෑ. එයා ඒ දෙකම උපේක්ෂාවෙන් විඳ ගන්නවා.
තිසරට ජීවිතේ නැතුවම බැරි කවුද
ඒක නං එයා තමයි දන්නේ” මං දන්නේ නෑ. ප‍්‍රශ්නයකදී නම් එයා මාත් එක්ක තමයි හැමදේම කතා කරන්නේ.
හැමදේම ඇවිල්ලා කියන්නේ මාත් එක්ක. එයාට හැමෝම ඕනෑ. එක්කෙනෙක් කියලා නෑ.
සංචාරයට කැමැති කොහේද
ලංකාවේ නං නුවරඑළිය තමයි යන්න කැමැතිම. විදෙස් රටවල නම් ස්විට්සර්ලන්ඩ් යන්න කැමැතියි.
ඉතාලි යන්න කැමැත්තෙන් ඉන්නවා. වෙලාව තමයි අඩු. වෙලාවක් ලැබුණොත් යනවා.
කවුද ළඟම යාළුවෝ
යාළුවෝ හුඟක් ඉන්නවා. එයාට ඉස්කෝලේ යාළුවොත් තාම ඉන්නවා.
එයාලා තාමත් කතා කරනවා. තාමත් ගෙදර එනවා. ගෲප් හදාගෙන ඒගොල්ලෝ කතා කරනවා. තමන්ගේ දේවල් ෂෙයාර් කරගන්නවා.
කැමැතිම ගායකයන්
මම දන්න විදිහට එයාගේ කැමැතිම ගායකයා ක්ලැරන්ස්. ක්ලැරන්ස්ගේ සිංදු ගොඩක් අහනවා. ඒ වගේම රූකාන්ත ගුණතිලකටත් කැමැතියි.
ගායිකාව නං මම දන්නේ නෑ” එහෙම කියලත් නෑ. ටී.එම්. ජයරත්නටත් මාර ආසයි. ඒ වගේම සුනිල් එදිරිසිංහටත් හුඟක් කැමැතියි. නිළියන්ගෙන් දීපිකා පදුකෝන්ට හුඟක් ආසයි.
ක්රිකට් ඇරුණුකොට දක්ෂ
ඊට අමතරව නම් එයා මුකුත් කරන්නේ නෑ. හැබැයි පාසැල් යද්දී එයා මුලින්ම කරලා තියෙන්නේ මලල ක‍්‍රීඩා. පස්සේ තමයි සර් කෙනෙක් කියලා තියෙන්නේ ක්රිකට් සෙල්ලම් කරන්න කියලා කියලා.
පිහිනුම් තරඟ ජයග‍්‍රහණ වලින් නම් එයාට හරියට මෙඩ්ල්ස් තියෙනවා. පිහිනුම් ක‍්‍රීඩාවෙන් සමස්ත ලංකා ජයග‍්‍රහණ පවා එයාට තියෙනවා.
ප‍්‍රථම ප්‍රේමය ගැන කියලා තියෙනවාද
දන්න විදිහට එහෙම නම් ලොකු දෙයක් කියලා නෑ. අපි ඉතිං පුංචි කාලේ ඉඳන් දන්නවා සහ ඕලෙවල් පන්තිවලදී පෙම්වතුන් වුණා.
මගේ නම් ප‍්‍රථම පේ‍්‍රමය තිසර. එයාගෙත් මම දන්න විදිහට මේ තමයි ප‍්‍රථම ප්‍රේමය.
මතකද දුන්න පළමු තෑග්ග
ඒක නම් මතක නෑ. හැබැයි මං පුංචි කාලේ ඉඳන් එයා මගේ හැම උපන්දිනේටම උපන්දින කාඩ් එවලා තියෙනවා. මම පුංචි නිසා ඒ දවස්වල අම්මා මට ඒවා දෙන්නේ නැතුව අරං තියලා.
අම්මා මට කිව්වෙත් නෑ. හැබැයි මෙහෙම සම්බන්ධයක් ගැන අම්මාට කිව්වට පස්සේ අම්මා අරං තියලා තිබුණු ඒ කාඩ් ඔක්කොම මට දුන්නා” එහෙනම් මේවත් එවන්න ඇත්තේ තිසර වෙන්න ඇති කියලා.
විවේකයක් ලැබුණොත්
විවේකයක් ලැබුණොත් කෑම හදාගෙන ගිහිල්ලා පාරේ ඉන්න අසරණ සතුන්ට” ඛෙත්තාරාම පිට්ටනියේ ඉන්න බල්ලන්ට කන්න දෙනවා.
පැටව් දාලා කෑම ටිකක් නැතුව සත්තු ඉන්නවා හරියට බඩගින්නේ. තිසරට පුළුවන් හැමවෙලාවේම ඒ සතුන්ට කෑම හදාගෙන ගිහිං කන්න දෙනවා. සතුන්ට කවුරුහරි හිරිහැර කරනවා දැක්කොත් නම් එයා කෑ ගහනවා. තිසර සතුන්ට හරිම ආදරෙයි.
