පසුගිය මැයි 29 වැනිදා මධ්‍යම රාත්‍රියේ මොරටුව, ලක්මැදුර හෝටලයට වෙඩි වරුෂාවක් එල්ල වන ආකාරය මුළු රටම දුටුවේය. එකී වෙඩි වරුෂාව එල්ල කළේ රත්මලාන ප්‍රදේශයේ පාතාල බලය වපුරන රත්මලානේ අංජු හෙවත් කුඩු අංජුගේ පාර්ශ්වයෙනි. ප්‍රංශයේ සිටින බවට සැලවන අමල් සිංහාර ද සිල්වා හෙවත් අංජු එරට සිට මෙරට ගෝලයන් මෙහෙයවමින් සිටී. එසේම ඔහුගේ ප්‍රධාන ගෝලයා වන ධර්මසිරි නමැත්තාද ඩුබායිහි වෙසෙන බවකි. හෝටලයට ප්‍රහාරය එල්ල කිරීමට පෙර ඩුබායි සිට හෝටල් හිමිකරු ලසන්ත ඇමැතූ ධර්මසිරි කීවේ, “උඹලට අපි ඉල්ලුවම තමයි සල්ලි දෙන්න බැරි… රෝහණගේ එවුන්ට ඕනතරම් දෙන්න පුළුවන්… අපි මේ සියලුම කප්පම් ගැනීම්… කුඩු බිස්නස් නතර කරනවා… රොහා ඉවරයක් කරපුදාට…”
එකී රෝහණ හෙවත් ගොනාකෝවිලේ රොහා නමින් ප්‍රකටව සිටි දෙව්මිණි රෝහණ හැරල් ද සිල්වා නමැති ප්‍රබල පාතාල නායකයා පසුගිය වසර කීපය තුළ රත්මලාන, මොරටුව, ගල්කිස්ස ප්‍රදේශ හොල්ලාගෙන සිටි මත් ජාවාරම්, කප්පම් ගැනීම් ඇතුළු මිනීමැරුම් රැසකටම වගකිවයුතු ප්‍රධානතම අපරාධකාරයෙකි.
පසුගියදා බස්නාහිර පළාත බාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් හෙළි කළ සක්‍රීය පාතාල කල්ලි විස්සෙන් එක් කණ්ඩායමක් මෙහෙය වූයේ ද මෙකී ගොනාකෝවිලේ රොහායි. පසුගිය කාලයේම රිමාන්ඩ් බන්ධනාගාරගතව සිටි රොහාට ඇප නියම වුවත් ඔහු කලක් යන තෙක්ම බන්ධනාගාරයේ ගත කිරීමෙන් පසු ඉකුත් ජනවාරි මාසයේ ඇප මත නිදහස් විණි. එලෙස නිදහස්වූ රොහා පසුව සැඟවුණු දිවියක් ගත කළේය. අඩුම තරමේ ඔහු තමාගේ විශ්වාසවන්ත සගයකුට වුව දුරකථන ඇමැතුමක් ගෙන තිබුණේ තමන් විසූ ප්‍රදේශයෙන් වෙනත් ප්‍රදේශයකට ගොස් බව පොලිස් බුද්ධි අංශද අනාවරණය කරගෙන තිබුණේය. එතරමටම රොහා ආරක්ෂාව ගැන සිතමින් සැඟවුණු දිවියක් ගත කළේ ආරක්ෂක අංශවලට බියට වඩා ඔහුගේ විරුද්ධ පාර්ශ්වකරුවන්ගෙන් බේරීම සඳහායි.
ඉකුත් සමයේ පොළොන්නරුව ප්‍රදේශයේ යුද හමුදා කඳවුරකින් පාතාලයට පැන්නු ගිනිඅවි තොගයෙන් ගිනිඅවි 24ක් කොස්ගොඩ තාරකා මඟින් රොහාගේ පාර්ශ්වයටද ලැබී තිබූ බවටද සැල විණි. එලෙස අවිආයුධ රැස් කරමින් අංජුගේ පාර්ශ්වය සමඟද මහා පරිමාණ ගැටුමකට අරඅඳිමින් සිටි රොහා ඇතුළු පාතාල සාමාජිකයන්ට වැඩ වැරදුණේ වත්මන් රජය ගෙනයන පාතාල මර්දන ඍජු වැඩපිළිවෙළ නිසායි.
ඊට බියෙන් මෙරට සිටින පාතාල සාමාජිකයන් යන-එනමං නැතිව හිස්ලූලු අත දිවයන බවක් පසුගිය දින කීපයේදීම වාර්තා විණි. එහිදී රොහාද ආගිය අතක් නොමැතිව සැඟවුණු දිවියක් ගතකරමින් කෙසේ හෝ මෙරටින් ඉන්දියාවට පලා යෑමට තැත් කරමින් සිටි බවට පොලිසියට තොරතුරු ලැබී තිබිණි.
මීට මාස දෙකකට පමණ පෙරදී පොලිසිය අනාවරණය කරගෙන තිබුණේ රොහා නුවරඑළිය ප්‍රදේශයේ සැරිසරන බවයි. වරෙන්තුකරුවකු වූ රොහාව කොටුකර ගැනීමට පොලිසිය යාමේදී ඔහුට ලැබුණු තොරතුරක් මත එම ප්‍රදේශයෙන් පලා ගොස් තිබුණේය. එසේම මීට සති දෙකකට පමණ පෙරදී ද රොහා කටුනායක ගුවන් තොටුපොළ හරහා රටකට පැනීමට උත්සාහ කර තිබුණේ ව්‍යාජ නමක් භාවිත කරමිනි. එම උත්සාහයේදී නමෙහි ගැටලුවක් වූ හෙයින් රොහා ගුවන් තොටුපොළ බලධාරින්ටද කොකා පෙන්නා පැන ගොස් තිබූ බව පොලිස් බුද්ධි අංශවලට සැලවී තිබිණි.
අනතුරුව ඔහු මීගමුව කොච්චිකඩේ ප්‍රදේශයෙන් ටෝලර් යාත්‍රවකින් ඉන්දියාවට පලා යෑමට තැත් කරන බවට බස්නාහිර උතුර දිසා අපරාධ කොට්ඨාසයට තොරතුරක් ලැබිණි. ඒ මීට දින කීපයකට පෙරදියි.
එම කොට්ඨාසයේ ස්ථානාධිපති ප්‍රධාන පොලිස් පරීක්ෂක නිවුන්හැල්ල විසින් එම කොට්ඨාසය බාර පසුගිය දිනවල පාතාල සාමාජිකයන් රැසක්ම අත්අඩංගුවට ගැනීමට මෙහෙයවූ නියෝජ්‍ය පොලිස්පති ප්‍රසාද් රණසිංහ මහතා දැනුවත් කෙරිණි. නියෝජ්‍ය පොලිස්පතිවරයාගේ උපදෙස් මත නිවුන්හැල්ල ප්‍රමුඛ කණ්ඩායම පසුගිය 24 දා අලුයම තුනට පමණ කොච්චිකඩේ, කම්මල්තොට වෙරළේ ධීවර කටයුතු සඳහා යොදාගන්නා ලෑලි නිවෙසක සැඟවී සිට ඉන්දියාවට පලා යෑමට මාන බලමින් සිටි රොහාව කොටුකර ගැනිණි.
පසුව ඔහුව අත්අඩංගුවට ගැනීමට යාමේදී ටී56 ගිනිඅවියක්ද සත්තකයේ තබාගෙන පොලිසියට වෙඩි ප්‍රහාරයක් එල්ල කෙරිණි. එහිදී පොලිසිය පවසන පරිදි, පොලිසිය සහ රොහා අතර වූ වෙඩි හුවමාරුවෙන් බරපතළ තුවාල ලත් රොහා මීගමුව රෝහලට ඇතුළත් කරන විටද මියගොස් සිටි බවයි. ඔහු සතුව ටී 56 ගිනිඅවියට අමතරව රිවොල්වරයක් සහ ඉන්දිය රුපියල් ලක්ෂ 3 කට ආසන්න මුදලක් මෙන්ම මෙරට රුපියල් එක්ලක්ෂ පනස්දහසක මුදලක්ද දුරකථන පහක් සහ සිම්කාඩ්පත් 25ක්ද විය. තවද ඇඳුම් කීපයක්ද තිබී ඇත.
වයස අවුරුදු 41ක් පමණ වූ රොහා අඟුලාන, පොදුජය මාවතේ පදිංචිව සිටියේය. මොරටුව, කල්දෙමුල්ලෙ කාන්තාවක හා විවාහ වී සිටි ඔහු මෑත කාලීන අපරාධකාරයන් අතර සිටි දරුණුම ගණයේ අපරාධ කල්ලි නායකයෙක් ලෙස සැලැකේ. සාමාන්‍යයෙන් අපරාධ කල්ලි නායකයන් සිය ගෝලයන් මෙහෙයවා අපරාධ සිදුකළත් රොහා තමන් විසින්ම බොහෝ අපරාධ සිදුකළ අයෙකි. එසේම මොහු ඕනෑම මොහොතකදී තමන් අත්අඩංගුවට ගැනීමට එන පොලිස් නිලධාරින්ටද වෙඩි ප්‍රහාර එල්ල කිරීමට සැදිපැහැදි සිටි ම්ලේච්ඡ පුද්ගලයෙකි.
මෑත කාලයේ තවත් ප්‍රබල අපරාධකාරයෙක් වන දැනට බූස්ස බන්ධනාගාරයේ සිටින ගණේමුල්ල සංජීව හෙවත් මාකිලංගමුව සංජිව සමඟ සමීප සබඳතා පැවැත්වූ රොහා අපරාධ ලෝකයට පිවිසීමේ කතාන්දර පෙළ ගැසෙන්නෙ මෙලෙසිනි.
ගල්කිස්ස ප්‍රසිද්ධ පාසලකින් උගත් රොහාගේ එකම පන්තියේ සිටි ගජමිතුරා වූයේ අසංක සිංහාර හෙවත් ලන්සියායි. ලන්සියාගේ බාප්පලා රත්මලාන හොල්ලාගෙන සිටි චණ්ඩින්ය. ඔහුගේ ලොකු බාප්පා වූ රත්මලාන, ගල්කිස්ස ප්‍රදේශවල බලය පතුරුවාගෙන සිටි රාජා 89 භීෂණ සමයේ ගොදුරක් විණි. ලන්සියාගේ තවත් බාප්පා කෙනෙකු වූ රංජිගේ දියණියක් සමඟ රොහාගේ යහළුවෙක් ප්‍රේම සබඳතාවක් අරඹා තිබුණේය. එය කන වැකුණු ලන්සියාගේ රංජි බාප්පා රොහාට සහ ඔහුගේ යහළුවාට හොඳට සැලැකුවේ ගුටි ප්‍රහාරයක් දෙමිනි.
ඒත් සමඟ රොහා සහ ලන්සියා අතර මිතුදමටද ‘තිත’ තැබිණි. පවුලේ වැඩිමලා වූ හෙයින් පවුල් බර ද කරට ගත් රොහා රැකියා කීපයම නිරත වීමෙන් පසු මොරටුවේ අවන්හලක රැකියාවට ගියේ වේටර්වරයකු ලෙසිනි. එම අවන්හලට පැමිණියේ එසමයේ ප්‍රබල අපරාධකාරයෙක්ව සිටි මොරටු සමන්ය. එමඟින් රොහාට මොරටු සමන්ගේ ඇසුරට අවාස්ථාව සැලැසිණි. මොරටු සමන්ගේ ඇසුර හරහා රොහාද ‘පොර’ක් වීමට තැත් කළේ අපරාධ සහ මත් ජාවාරමට එක් වෙමිනි. ඔහුගේ නැඟී සිටීම අභියෝගයක් ලෙස සැලකූ ලන්සියාගේ බාප්පා කෙනෙකු රොහාව පොලිසියට කොටුකර දුන්නෙ බෝම්බ සිද්ධියක් මුල්කරගෙනයි. ඒ හරහා බන්ධනාගාරගත වන රොහාට අපරාධ ලෝකයේ බොහෝ පුද්ගලයන් හඳුනා ගැනීමට හැකි විණි. පොලිස් විශේෂ කාර්ය බළකායේ සිටි බයිසිකල් බේබිද ඒ අතර විය.
එලෙස ව්‍යාජ සිද්ධියක් මුල් කරගෙන රොහා පොලිසියට කොටුකර දීමේ සැලැසුම සකස්කර තිබුණේ ලන්සියාගේ බාප්පා කෙනෙකු වූ එවකට දෙහිවල ගල්කිස්ස නගර සභාවේ මන්ත්‍රීවරයෙක් වූ කා අතරත් පොඩි මහත්තයා ලෙස ප්‍රකටව සිටි පුද්ගලයායි.
බන්ධනාගාරයෙන් අපරාධ ලෝකයට ‘උපාධිය’ ලබා එළියට එන රොහා තමා ව්‍යාජ ලෙස සිරගත කළ නාගරික මන්ත්‍රී පොඩි මහත්තයා ඝාතනය කෙරිණි. ඒ 2007 වසරේදීය. එය ඔහුගේ පළමු බිල්ල විය. එසේම බයිසිකල් බේබි යොදවා රොහාට සහ ඔහුගේ යහළුවාට පහර දුන් ලන්සියාගේ රංජි බාප්පාද පාණදුරේදී ඝාතනය කෙරිණි. මේ අතරේ මොරටු සමන්ද වෙඩි ප්‍රහාරයකින් පරලොව ගියේය. ඉන් පසුව සමන්ගේ ජාවාරම් සියල්ල කරටගෙන නැඟි සිටි රොහා කොල්ලකෑම්, කප්පම් ගැනීම්, මත් ජාවාරම්, මිනීමැරුම් යහමින් සිදුකරමින් ගෝලයන් පිරිසක්ද එක්කරගනිමින් ප්‍රබල අපරාධකරුවකු ලෙස සමාජයට පිළිලයක් වෙමින් ඉදිරියට ආවේය.
සිදුකරන ලද අපරාධවලට නැවතත් පොලිසියට කොටුවන රොහා 2008 වසරේදී නැවතත් රිමාන්ඩ් බන්ධනාගාරගත කෙරිණි. මේ අතර සිය බාප්පලා දෙදෙනකුටම මරු කැඳවූ රොහාගෙන් පළිගැනීමට ලන්සියාද පෙරට එමින් සිටියේය. මත් ජාවාරමටද එක්ව සිටි ලන්සියා රත්මලානේ ප්‍රබල අපරාධකාරයකු ලෙස ඉදිරියට ආවේය. රත්මලාන, ගල්කිස්ස, ප්‍රදේශයේ මත් ජාවාරම් ගැටුම් හරහා ලන්සියා සහ රොහා අතර ගැටුම් තවත් උග්‍ර විණි.
එම ප්‍රදේශවල පොලිසිවල ලොකු ලොක්කන් සමඟද සබඳතා තිබූ ලන්සියා නැවතත් රොහා පොලිසියට කොටුකර දුන්නේය. 2010 වර්ෂය පමණ වන විට රොහා – ලන්සියා දෙපාර්ශ්වයේ සගයන්ගේ ගැටුම් තීව්‍ර ලෙස ඉහළ ගොස් තිබිණි. අනතුරුව එම ප්‍රදේශයේ එවකට රජයේ ඇමැතිවරයකුගේ මැදිහත්වීමෙන් දෙපාර්ශ්වය සාමදානද කෙරිණි. ඊට දෙපාර්ශ්වයේ වැඩිහිටියන්ද මැදිහත් විණි.
එහෙත් දෙදෙනා අතර නැවතත් විරසකය ඇති කිරීමට දෙපාර්ශ්වයේ ඇතැම් දෙනා මාන බලමින් සිටියේය. ඒ දෙදෙනා අතර කේළාම් පතුරුවමිනි.
එහෙත් වසර දෙක තුනක පමණ කාලයක් දෙපාර්ශ්වයේ ගැටුම් නොපැවැතියත් නැවතත් රොහාගේ සහ ලන්සියාගේ ඥාතියෙක් අතර ගැටුමක් ඇති වූයේය. ඒ ත්‍රිරෝද රථයක් හා මෝටර් රථයක් මාර්ගයේ හරස් වීමෙනි.
ඒ වන විට ප්‍රබලව සිටි ලන්සියා ඊට ප්‍රතිචාර දැක්වූයේ ගිනිඅවි අතැතිව පිරිසක් සමඟ රොහා නොමැති අවස්ථාවක ඔහුගේ නිවෙසට ගොස් බැණ තර්ජනය කරමිනි. පසුව ලන්සියා සැලැසුම් කර තිබුණේ රොහාව ‘ඉවරයක්’ කිරීමටයි. එහෙත් 2016 වසරේ ජුනි 23 වැනිදා රොහා ඉස්සර වූයේය.
ලන්සියා මත්කුඩු නඩුවකට බිරිය සහ දියණිය සමඟ මහර අධිකරණයට ගොස් සුදු පැහැති හයිබ්‍රිඩ් රථයට ගොඩවෙද්දීම රොහා, බයිසිකල් බේබි සහ එයා‍ෙෆා්ස් සම්පත් සමඟ මෝටර් රථයකින් පැමිණ වෙඩි ප්‍රහාරයක් එල්ල කළේ ලන්සියාගේ ජීවිතය එතැනම ඉවර කරමිනි.
ලන්සියා ඝාතනයෙන් පසු රොහා සැඟවුණු දිවියක් ගත කළේය. ලන්සියාගේ මරණ කටයුතු සිදු කෙරුණේ ගල්කිස්ස සුසාන භූමියේදී හෙලිකොප්ටරයකින් මල් වරුෂාද පතිත කරමිනි. ලන්සියාගේ සහෝදරයෙක් වන රත්මලාන අංජු හෙවත් වත්මනෙහි කුඩු අංජු ලෙස ප්‍රකටව සිටින අමල් සිංහාර ඒ වන විට කිසිදු අපරාධ ක්‍රියාවකට සම්බන්ධ නොවූ අයෙකි. සිය සහෝදරයාගේ මරණයෙන් පසු රෝහාට බියෙන් අංජු පලා යන්නෙ මැලේසියාවටය. එහි සිට ඔහු සහෝදරයාගේ ගෝලයන්ද එකතුකොට අපරාධ ලෝකයට පිවිසියේ රොහා ඉවරයක් කිරීමේ අටියෙනි. එසේම ලන්සියා ඝාතනය කොට දින කීපයක් ඇතුළතදී රොහාගෙන් පළිගැනීමේ චේතනාව ඇතිව අංජුගේ මෙහෙයවීමෙන් රොහාගේ පුංචි අම්මාගේ පුත්‍රයා වූ ප්‍රභාත් නමැත්තා ඝාතනය කළේ පිළියන්දල, බෝකුන්දරදියි. එසේම අංජු, රොහා ඝාතනය කරන පුද්ගලයකු කෝටි 2ක මුදලක් දෙන බව කී අතර පසුව එය කෝටි 4 දක්වා ඉහළ නැංවූයේ සමාජ මාධ්‍යයන්හිද ‘පොස්ට්’ පළ කරමිනි.
මේ අතරේ 2016 නොවැම්බර් 15 වැනිදා රොහා සහ බයිසිකල් බේබි මෝටර් රථයකින් යන්නෙ කුරුණෑගලටයි. එම රථය ගෙන තිබුණේ මොරටුවේ කුලී රථ ආයතනයකිනි. වංචාවකට තුඩු දුන් එම රථයෙහි ජීපීඑස් මඟින් කුරුණෑගල රථය තිබෙන බව හඳුනා ගැනිණි. කුලී රථ ආයතනය 119 හරහා දැන්වීමත් සමඟ කුරුණෑගල පොලිසියේ රාජකාරි කළ 58 හැවිරිදි උපපොලිස් පරීක්ෂක රත්න දසනායක සහ කොස්තාපල් උදයකාන්ත බණ්ඩාර රොහා නතරව සිටි හෝටලයට ගොස් රථය පරීක්ෂා කිරීමට සැරැසෙද්දීම ඒ බව කිසිත් නොදත් රොහා ඔහුව අත්අඩංගුවට ගැනීමට පැමිණියේයැයි සිතා පොලිස් නිලධාරින් දෙදෙනාට වෙඩි ප්‍රහාරයක් එල්ල කෙරිණි. ඉන් රත්න දසනායක එතැනම මරුමුවට පත්විණි. කොස්තාපල් බරපතළ තුවාල ලැබීය.
එසැණින් ක්‍රියාත්මක වූ පොලිස් නිලධාරින් බස් රථයකට නැඟි පලා යෑමට තැත් කළ රොහා අත්අඩංගුවට ගැනිණි. ඔහුගේ සගයා බයිසිකල් බේබි හම්බන්තොට මීගහජදුර ප්‍රදේශයේ හේනක සැඟවී සිටියදී 2017 අප්‍රේල් 27 වැනිදා පොලිස් වෙඩි පහරකින් මරණයට පත් විය.
මේ අතරේ රොහා ඝාතනයට කුඩු අංජු නොයෙක් ආකාරයේ ‘ප්ලෑන්’ හදමින් සිටියේය. එවැනි ප්ලෑනක් අනුව 2017 මාර්තු මස 01 වැනිදා වැලිකඩ බන්ධනාගාරයේ සිට මත්කුඩු නඩුවකට රොහා රැගෙන ආවේ ගල්කිස්ස අධිකරණයටයි. එදින ගිනිඅවියක්ද සහිතව අධිකරණ භූමියට කුඩු අංජු විසින් මයියා නමැති සගයා යැව්වත් එදින ඔහුගේ අතින් බන්ධනාගාර බංකුවක් යටට සිය ගිනිඅවිය සහිත පාර්සලය වැටීමෙන් රොහාට තවදුරටත් ජීවත්වීමේ වාසනාව ලැබිණි.
එසේම අංජු විසින් 2019 අප්‍රේල් 08 වැනිදා රොහා ඝාතනයට තැත් කළේ දූෂිත බන්ධනාගාර නිලධාරින් මඟින් බන්ධනාගාරය තුළට සයනයිඩ් යවා රැඳවියකු මාර්ගයෙන් සයනයිඩ් එන්නත් කරමිනි. එම ප්‍රයත්නයද ව්‍යර්ථ වූයේ බස්නාහිර පළාත් බුද්ධි කොට්ඨාසයේ නිලධාරින්ට හෝඩුවාව යෑමත් සමඟ බන්ධනාගාරයේ සිදුකළ සෝදිසියේදී සයනයිඩ් සමඟ මරාල සුරංග නමැති අධික ලෙස මත්ද්‍රව්‍යවලට ඇබ්බැහිව සිටි රැඳවියා අත්අඩංගුවට ගැනීමත් සමඟිනි. තවද ගිය වසරේම ගිනිඅවියක් කුඩා කොටස්වලට ගලවා බන්ධනාගාරය තුළට යවා රොහාට වෙඩි ප්‍රහාරයක් දියත්කොට ඝාතනය කිරීමටද අංජු ප්ලෑන් කළේය. එම අවස්ථාවේදීද බස්නාහිර පළාත් බුද්ධි කොට්ඨාසයට ලැබුණු තොරතුරු අනුව බන්ධනාගාරයට යවා තිබූ ගිනිඅවියේ සියලු කොටස් සොයා ගැනීමට හැකි වූයේ දමිළ සැකකරුවෙක්ද සමඟිනි.
කෙසේ හෝ ලන්සියා – අංජු පාර්ශ්වය සහ රොහා පාර්ශ්වයේ ගැටුම් නිසාවෙන් වසර 20ක පමණ කාලය තුළදී පුද්ගල ඝාතන 20කට අධික ප්‍රමාණයක් සිදුව ඇති බවකි. එම ඝාතනවලින් 14කට පමණ රොහා ඍජුවම වගකිවයුතු බව පොලිස් පොත්වලද සඳහන්ව ඇති බවකි. මෙකී දෙපාර්ශ්වයේ ගැටුම් නිසාවෙන් රොහාගේ පාර්ශ්වකරුවෙක් යැයි ක්‍රිකට් ක්‍රීඩක ධනංජය සිල්වාගේ පියාණන් වූ නාගරික මන්ත්‍රීවරයෙක් වූ රංජන් ද සිල්වාද අංජුගේ පාර්ශ්වයෙන් 2018 වසරේ මැයි 24 වැනි දින ඝාතනය විය.
අවසානයේ විසි වසරකට අධික කාලයක් ගල්කිස්ස, රත්මලාන, මොරටුව ප්‍රදේශ වෙලාගෙන තිබූ පාතාල ගැටුම්හි එක් පාර්ශ්වකරුවකුගේ මරණය මෙලෙස සිදු වූයේ අපරාධකාරයන්ට අත්වන ඉරණම පසක් කරමිනි. ඔහුගේ මරණය නිසාවෙන් එක් පාර්ශ්වයක් දුක් වෙද්දී අංජුගේ පාර්ශ්වය ‘ගේම් ඕවර්’ (Game Over) යනුවෙන් සඳහන් කරමින් සමාජ මාධ්‍ය ‘පෝස්ට්’ පළ කරමින් ‘පාටි’ දමන්නෙ මල්වෙඩි සංදර්ශනද පවත්වමින් ප්‍රිති ඝෝෂා නඟමිනි.
උපුටා ගැනීම – සිළුමිණ පුවත්පත
