2022 ICC පන්දුවාර විස්සයි 20 ලෝක කුසලාන ක්‍රිකට් තරගාවලියේ සුපිරි 12 දෙනාගේ වටය සඳහා ඍජුවම සුදුසුකම් ලබාගැනීමේ අවස්ථාව ශ්‍රී ලංකා කණ්ඩායමට අහිමි වී තිබෙනවා.
ඒ අනුව මේ වසරේ මෙන්ම ලබන වසරේ පැවැත්වෙන ලෝක කුසලාන තරගාවලියේ දී ද ශ්‍රී ලංකාවට සුදුසුකම් ලබාගැනීමේ වටය සඳහා තරග වැදීමට සිදුවන බවයි ජාත්‍යන්තර ක්‍රිකට් කවුන්සිලය පෙන්වා දෙන්නේ.
මේ වසරේ නොවැම්බර් මස 15 වන දින වනවිට 20/20 ශ්‍රේණිගත කිරීම්හි පෙරමුණේ පසුවන කණ්ඩායම් 08, මීළඟ පන්දුවාර 20/20 ලෝක කුසලාන ක්‍රිකට් තරගාවලියට ඍජුවම සුදුසුකම් ලබාගන්නා කණ්ඩායම් අතරට ඇතුළත් වනවා.
ඒ අනුව එංගලන්තය, පාකිස්ථානය, ඉන්දියාව, නවසීලන්තය, ඔස්ට්‍රේලියාව, ඇෆ්ගනිස්ථානය සහ බංග්ලාදේශය එම කණ්ඩායම් අතරට අයත්.
ශ්‍රී ලංකා කණ්ඩායම ශ්‍රේණිගත කිරීම්හි 9 වන ස්ථානයේ පසුවනවා.
මෙවර ලෝක කුසලාන තරගාවලියේ ඊයේ ඔස්ට්‍රේලියානු කණ්ඩායම සමග පැවති තරගයෙන් බටහිර ඉන්දීය කොදෙව් කණ්ඩායම පරාජයට පත්වීමත් සමග ඔවුන් ශ්‍රේණිගත කිරීම්හි 10 වන ස්ථානය දක්වා පහත බැස තිබෙනවා.
