මෙවර පාර්ලිමේන්තු මහ මැතිවරණයේ මහනුවර දිස්ත්‍රික් ප්‍රතිපලයට එරෙහිව අධිකරණ ක්‍රියා මාර්ග ගැනීමට තමන් බලාපොරොත්තුවන බව ජල කරාමය ලකුණින් ස්වාධින කණ්ඩායම් අංක 01 න් තරග කළ අමිත් වීරසිංහ ප්‍රකාශ කර සිටිනවා.
මාධ්‍ය හමුවක් කැඳවමින් ඔහු ප්‍රකාශ කළේ ජන්ද ගණන් කිරිමේ මධ්‍යස්ථානවලදී තමන්ට දැඩි අසාධාරණයක් වූ බවයි.
සිය කණ්ඩායමට ලද ජන්ද සංඛ්‍යාවට වඩා වැඩි ජන්ද සංඛ්‍යාවක් ප්‍රතික්ෂේපිත ජන්ද බවට ගණන් කිරිමේ නිලධාරින් නම් කර තිබු බවත් එම ජන්ද පත්‍රිකාවල සිය ස්වාධින කණ්ඩායමට මෙන්ම පොදුජන පෙරමුණ ඉදිරියේ ජන්දය ලකුණු කොට තිබු අයුරු සිය නියෝජිතයින් දැක තිබෙන බව අමිත් වීරසිංහ ප්‍රකාශ කර සිටියා.
අවම වශයෙන් මන්ත්‍රිධුර දෙකක් හෝ සිය කණ්ඩායමට හිමිවිය යුතුව තිබුනත් අවසානයේදී එකදු මන්ත්‍රීධුරයක් හෝ නොමැතිව මහනුවර දිස්ත්‍රික්කයේ තුන්වන බලවේගය බවට සිය ස්වාධින කණ්ඩායම පත්වූ බව ඔහු මෙහිදී සඳහන් කළා.
මේ සම්බන්ධයෙන් මැතිවරණ කොමිෂන් සභාවේ නිලධාරින් දැනුවත් කළද ඔවුන් එයට ලබාදුන් පිළිතුර සෑහීමට පත්නොවන බැවින් අධිකරණයේ සහය පැතීමට තීරණය කළ බව අමිත් වීරසිංහ වැඩිදුරටත් සඳහන් කර සිටියා.
