ටෙලි නාට්‍ය පිටපත් රචකයෙක් හා සංස්කාරකවරයෙකු වූ දමිත චන්ද්‍රසිරි පසුගිය 24 වැනිදා සිට අතුරුදන්වී ඇති බව වාර්තා වනවා.
මේ සම්බන්ධයෙන් වැලිකඩ පොලිසියේ පැමිණිල්ලක්ද සිදුකර තිබෙනවා.
දමිත අනුරාධපුර ප්‍රදේශයේ පදිංචිකරුවෙකු වන අතර ඔහු වත්තල ප්‍රදේශයේ නිවසක් කුළී පදනමට ගෙන ජීවත්ව සිට තිබෙනවා.
ටෙලි නාට්‍ය රචක ලක්මාල් ධර්මරත්නද සිය සමාජ ජාල ගිණුමෙන් සටහනක් තබා තිබෙන අතර එම සටහනේ ඔහු සඳහන් කර ඇත්තේ දමිත හුදකලාවේ ජීවත් වීමට ප්‍රය කරන පුද්ගලයෙකු බවයි.
එම සම්පූර්ණ සටහන් පහතින් ….
හිතවතුනි ,
පසුගිය 24 (ඔක්)දා සිට දමිත සහෝදරයා අතුරුදන් බව සත්‍යයකි.මා විසින් මේ සම්බන්ධයෙන් වැලිකඩ පොලිසියේ පැමිණිල්ලක් දැමූ අතර මේ පිළිඹද facebook ඔස්සේ දැනුවත් නොකළේ ඔහු නැවත පැමිණියහොත් ඔහු මුහුණ දෙන අපහසුතාව ගැන කල්පනා කිරීමෙනි.
නමුත් දැන් එය පොදුවේ ප්‍රවෘත්ති මාධ්‍ය වෙත නිකුත්වී ඇතිනිසා එය සත්‍යයක් බව මෙසේ සනාත කරමි.
දමිතයා facebook හෝ පාවිච්චි නොකළේ, කිසිම මාධ්‍යක පෙනී නොසිටින්නේ පුද්ගලිකත්වය ඌ ඉතා අගයකල බැවිනි. එබැවින් මගෙන් මීට කලකට පෙර දමිතයා ඉල්ලා සිටි පරිදි දිනක ඌ ගියහොත් සොයමින් කරදර නොකරන ලෙසට කළ ඉල්ලීම මගේ සහෝදරයා වූ ඌ වෙනුවෙන් මම හැකිපමණ ඉටුකරමි.
මා facebook පිටුවේ කවරයේ චායාරූපය ලෙස දැමූයේ දමිතයා තම ලැප්ටොප් තිරයේ අන්තිමට දමාගෙන සිටි පිංතූරයයි.
දමිතයා අන්තිම මොහොත දක්වා හැමවිටම ඉල්ලා සිටියේ ඌට නිදහස අත්‍යාවශ්‍ය බවයි. ඉතිං ඌ ඒ නිදහසේ කොහේහෝ ඇතැයි මම විශ්වාස කරමි සහ ඒ නිදහසට මම බාධා නොකරන්නට උත්සාහ කරමි.
මේ සම්බන්දයෙන් වැලිකඩ පොලීසිය පරීක්ෂණ පවත්වන අතර ඒ වෙනුවෙන් අපගේ උපරිම සහායදෙමින් සිටිමු.
දමිත ,
උඹ කොහේහෝ සිට උඹේ fake එකකින් හෝ කියවනවානම් අඩුම එක මැසේජ් එකකින් අපට උඹ ඉන්න බව කියන මෙන් ඉල්ලන අතර ඉන්න තැන කිසිසේත්ම අවශ්‍ය නැත.
දමිතයාගේ කැමතිම චිත්‍රපටය කවදත් “Into the Wild ” ය.
මේ සටහන තබන්නේද දැන් මෙය ප්‍රවෘත්තියක් වී අවසන් නිසාවෙනි.
