මත්ද්‍රව්‍ය ජාවාරම්, මිනීමැරුම්, කොල්ලකෑම් ඇතුළු මහා පරිමාණ අපරාධ ක්‍රියාවන්හි නිරත වන සංවිධානාත්මක අපරාධකාරයන් හෙවත් පාතාලයන්ගේ හිස එසවීම් අවස්ථා කිහිපයක්ම පසුගිය දිනවලදී සිදු විණි. කොරෝනා වසංගතයට රටම අක්‍රියව තිබී නැවතත් යථා තත්ත්වයට පත් වෙමින් තිබියදී පොලිසියටද අභියෝග කරමින් පාතාල සාමාජිකයන් වෙඩි පිට වෙඩි තබා පලා ගියේ මොරටුව – සොයිසාපුර හෝටලයකටයි.
එම ප්‍රහාරයත් සමඟ පාතාලයන්ට එරෙහිව රජය ක්ෂණික ක්‍රියාමාර්ග ගත්තෙ ජනාධිපති ගෝඨාභය රාජපක්ෂයන් පොලිසිය ඇතුළු සියලු ආරක්ෂක අංශවලට අවශ්‍ය උපදෙස් ලබා දෙමිනි. ඒ අනුව ආරක්ෂක ලේකම් විශ්‍රාමික මේජර් ජෙනරාල් කමල් ගුණරත්නගේද උපදෙස් මත පොලිස්පතිවරයාගේ මඟ පෙන්වීමෙන් පොලිසිය සහ පොලිස් විශේෂ කාර්ය බළකාය මේ වන විට දිවා රෑ නොබලා පාතාල අපරාධකාරයන් සොයා මෙහෙයුම් දියත් කරමින් සිටී.
එම මෙහෙයුම්වලදී දිනපතාම පාහේ පාතාල සාමාජිකයන් අත්අඩංගුවට පත්වන්නෙ මත්ද්‍රව්‍ය, ගිනිඅවි, නීති විරෝධිව උපයාගෙන ඇති කෝටි ගණන් මුදල් සහ රථවාහන ඇතුළු දේපොළ වත්කම් සමඟිනි.
බස්නාහිර පළාත බාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා විසින් පාතාල මර්දනය පිළිබඳව හෙළි කරමින් මේ වන විට බස්නාහිර පළාත කේන්ද්‍රකොට සක්‍රීයව සිටින පාතාල කල්ලි 20ක් පිළිබඳව හෙළි කෙරිණි. එහිදී එම කල්ලිවලට අයත් සාමාජිකයන් 388 දෙනෙක්ද හඳුනාගෙන ඇති බවත් ඉන් 26 දෙනෙක් පමණ අත්අඩංගුවට ගෙන ඇති අතර සෙසු පිරිසද අත්අඩංගුවට ගැනීමට පොලිසිය කටයුතු කරන බව සඳහන් කළේය.
එසේම පසුගිය කාලයේ එවන් අපරාධ කල්ලි 26ක් තිබී ඇති බවද ජ්‍යෙෂ්ඨ නියෝජ්‍ය පොලිස්පතිවරයා කීවේය. ඒ, පසුගිය කාලය පුරාවට රටම වෙළා ගනිමින් අපරාධ සිදු කරමින් සාමාජිකයන් 100කට නොඅඩුව සිටි බවට සැලවන වන මාකඳුරේ මධුෂ්ගේ කල්ලිය ඇතුළු කංජිපාන ඉම්රාන්, අංගොඩ ලොක්කා, කොස්ගොඩ තාරක, කොස්ගොඩ සුජි, කුඩු අංජු, ගොනාකෝවිලේ රොහා, ගනේමුල්ල සංජීව, කෙසෙල්වත්ත දිනුක, ගොත අසංක, ඌරු ජුවා, වැල්ලෙ සාරංග, කුඩු රොෂාන්, ගම්පහ ඔස්මන්, බ්ලුමැන්ඩල් සංඛ, දෙමටගොඩ චමින්ද, කුඩු සෙල්වි, පූකුඩුකන්නා, වැල්ලෙ සුරංග, චූටි උක්කුං, දූනගහ සුජී, මහවත්තෙ චුට්ටේ, කොටහේන චානා, සේදවත්තෙ චුට්ටේ, ආමි සම්පත් සහ ලලිත් පින්තු යන නමින් පෙනී සිටි අපරාධකාරයන් විසින් මෙහෙයවූ සහ මෙහෙයවන කල්ලිය. එම කල්ලි අතරින් ආමි සම්පත්, මහවත්තෙ චාමර, සේදවත්තෙ චුට්ටේ, කොටහේනේ චානා, ලලිත් පින්තු සහ දූනගහ සුජී මෙහෙයවූ කල්ලි හය මේ වන විට අක්‍රියව ඇති බවද පොලිසිය අනාවරණය කරගෙන තිබේ. ඒ, එම කල්ලි නායකයන් සහ ගෝලබාලයන් බොහොමයක් දෙනා අත්අඩංගුවට පත්ව බන්ධනාගාරගත වීම නිසාවෙනි.
සක්‍රියව ඇති කල්ලි විස්සෙහිද බොහොමයක ප්‍රධානීන් නීතියේ රැහැනට කොටු වී හෝ නැතිනම් පරලොවය. එහිදී ගිය වසරේ පෙබරවාරි 04 වැනිදා ඩුබායිහිදී අත්අඩංගුවට පත් මාකඳුරේ මධුෂ් රැඳවුම් නියෝග මත අපරාධ පරීක්ෂණ දෙපාර්තමේන්තුව බාරයේ පසුවෙද්දී එදිනම ඩුබාහියිදී අත්අඩංගුවට පත් කංජිපාන ඉම්රාන්, ගනේමුල්ල සංජීව, භාරත ලක්ෂ්මන් ප්‍රේමචන්ද්‍ර ඝාතනයට මරණ දණ්ඩනය නියමව සිටින දෙමටගොඩ චමින්ද, ගොත අසංක, ඌරු ජුවා, කුඩු රොෂාන්, බ්ලුමැන්ඩල් සංඛ, කොස්ගොඩ තාරක වැන්නන් මේ වන විට පසුවන්නෙ දරුණු ගණයේ අපරාධකාරයන් රඳවා තැබෙන බූස්ස බන්ධනාගාරයේ වෙන් වෙන් කුටිවලයි.
සක්‍රීය කල්ලි 20න් මෝදර, මට්ටක්කුලිය, ග්‍රෑන්ඩ්පාස් සමිට්පුර ප්‍රදේශවල පාතාල බලය ක්‍රියාත්මක කළ චූටි උක්කුං නමින් ප්‍රචලිතව සිටි කාරියප්පෙරුමගේ ගයාන් නමැත්තා 2016 වර්ෂයේ නොවැම්බර් මස 23 වැනිදා කුඩු රොෂාන්ගේ කල්ලිය අතින් මරණයට පත්වීමත් සමඟ ඔහුගේ කල්ලියේ සගයන් මේ වන විට ආම් සම්පත්, ගනේමුල්ල සංජීව වැනි වෙනත් අයගේ කල්ලිවලට එක්ව සිටින බවකි. එහෙත් චූටි උක්කුංගේ මල්ලි වන ප්‍රියංකරද මේ වන විට පිරිස් එක්රැස් කරමින් සිටින වගකි.
මෙකී කල්ලි විස්සට අයත් එකම කාන්තාව වන කුඩු සෙල්විද මේ වන විට පරලොව ගොස් අවසානය. දැනට ඉන්දියාවට පැනගොස් සිටින පූකුඩුකන්නාගේ කල්ලියේ සිටින එල්ටීටීඊ සංවිධානයේ චාල්ස් ඇන්තනී බළකායේ සිටි ස්ටැන්ලි කෙනඩි හෙවත් බුම්මා විසින් 2015 සැප්තැම්බර් 15 වැනිදා සෙල්විගේ නිවෙසටම ගොස් සිදුකළ වෙඩි ප්‍රහාරයකිනි.
පුකුඩුකන්නාගේ කල්ලියේ සිටින බුම්මා යනු මෙරට පාතාල ලෝකයේ සිටින දෙඅතින්ම ගිනිඅවි හැසිරවිය හැකි භයානකම වෙඩික්කරුවා ලෙස සැලැකේ. ඔහුව දකුණේ පාතාලයට ඇද ගැනුණේ කොස්ගොඩ සුජි විසිනි.
ඒ බුම්මා සහ කොස්ගොඩ සුජි බුස්ස බන්ධනාගාරයේ සිටියදී ඇතිවූ මිතුදම හරහායි.
සෙල්විගේ ඝාතනයත් සමඟ කරළියට ආ ඇයගේ පුතුන් තිදෙනා වන පලනි ශිරාන්, පලනි කෙනිස්ටන් සහ පලනි රිමෝෂන් පොලිසියට කොටු වූයේ පසුගිය කාලයේ ජම්පටා වීදිය ඇතුළු මෝදර, මට්ටක්කුලිය ප්‍රදේශවල සිදුකළ මිනිස් ඝාතනයන් රැසක් නිසාවෙනි.
ශිරාන් සහ කෙනිස්ටන් අඟුණකොළපැලැස්ස බන්ධනාගාරයේත්, රිමෝෂන් රැඳවුම් නියෝග මත කොළඹ අපරාධ කොට්ඨාස බාරයේත් පසු වේ.
ඔවුන් සිදුකළ බොහෝ ඝාතනයන්ට සහාය වූයේ මධුෂ් සහ කංජිපාන ඉම්රාන්ය. කංජිපානගේ මත්ද්‍රව්‍ය ජාවාරම පසුගිය කාලය පුරාවටම කොළඹ නගරය තුළ සිදු කළේ සෙල්විගේ මෙකී දරුවන් තිදෙනා විසිනි.
එම නිසා මධුෂ්, කංජිපාන සමඟ සෙල්විගේ දරුවන්ට සමීප සබඳතාවක් තිබිණි. මධුෂ්ගේ වෙඩික්කරුවන් යොදාගෙන සෙල්විගේ දරුවන් විසින් පුකුඩුකන්නාගේ පියාණන්ද ඝාතනය කෙරිණි.
සෙල්විගේ පාර්ශ්වය සමඟ මත්ද්‍රව්‍ය ජාවාරම නිසාවෙන් එලෙස ගැටුමක් පැවැති පුකුඩුකන්නාගේ පාර්ශ්වයේ බොහෝ දෙනෙක් පසුවන්නෙ ඉන්දියාවේය. පුකුඩුකන්නා එකී කල්ලියට නායකත්වය දුන්නත් එම පිරිස මෙහෙයවනු ලබන්නෙ දැනට ඉන්දියාවේ පසුවන සින්නයියා ගුණරත්නම් හෙවත් කිඹුලාඇළ ගුණා නමින් ප්‍රකට අපරාධකාරයාගේ සහෝදරයා වන ඉන්දියාවේම සිටින අරිසරත්නම් සුරේෂ් රාජ් හෙවත් පොඩි සුරේෂ් නමැත්තා ය.
පුකුඩුකන්නාගේ නැඟණිය විවාහ කරගෙන සිටින පොඩි සුරේෂ්ට දෙමළ ඩයස්පෝරාව සමඟද සබඳතා තිබෙන බවකි. මධුෂ්ව ඩුබායි පොලිසියට කොටුකර දීමේ පිටුපස සිටි පුද්ගලයෙක් ලෙසටද සුරේෂ් සැලැකේ.
එසේම මෙකී සක්‍රිය කල්ලිවල තවත් පිරිසක් රටින් පළා ගොස් වර්තමානයේ කල් ගෙවන්නෙ විදෙස් රටවලයි. විදේශවල සිට දුරකතන ඔස්සෙ සිය ගෝලබාලයන් මෙහෙයවමින් මිනීමැරුම්, කප්පම් ගැනීම්, කොල්ලකෑම් ඇතුළු සියලු අපරාධ ක්‍රියාවන් ඔවුන් විසින් මෙහෙයවයි.
එකී පිරිසෙන් රත්මලාන, මොරටුව කේන්ද්‍රකොට පාතාල බලය පතුරුවන කුඩු අංජු ඉතාලියේ වෙසෙන බවටත්, අංගොඩ ලොක්කා, පූකුඩුකන්නා, වැල්ලෙ සුරංග ඉන්දියාවේ සිටින බවත්, කොස්ගොඩ සුජී සහ සෙල්වත්තෙ දිනුක ඩුබායි රාජ්‍යයේ සිටින බවත් සැලවේ.
විදේශයන්හි පසුවන එම කල්ලි ප්‍රධානීන් සමඟ 13 දෙනෙක් පමණ පොලිසිය හඳුනාගෙන ඇති අතර ඔවුන්ද ඉදිරියේදී මෙරටට ගෙන්වා ගැනීමට ජාත්‍යන්තර පොලිසියට රතු නිවේදන නිකුත් කිරීමට පොලිසිය අවශ්‍ය නීතිමය කටයුතු සිදුකරන බව පවසයි. මේ වන විට නිදැල්ලෙ පසුවන්නෙ ගොනාකෝවිල රොහා, ගම්පහ ඔස්මන් සහ වැල්ලෙ සාරංග පමණි.
ඉන් ගොනාකෝවිල රොහා බන්ධනාගාරයෙන් ඇප ලබා පිටව ගියත් ඔහු එදින සිටම ආගිය අතක් නැත. රොහා සැඟවුණු දිවියක් ගත කරමින් සිටින්නෙ කුඩු අංජුගේ පාර්ශ්වයෙන් තිබෙන මර බිය නිසාවෙනි. පසුගිය දිනවල කුඩු අංජු ගැන බොහෝ සේ කතාබහට ලක්වූයේ විදේශයේ සිට දුරකථන ඔස්සෙ සිය ගෝලබාලයන් මෙහෙයවමින් මොරටුව, සොයිසාපුර හෝටලය එල්ල කළ ප්‍රහාරයත් සමඟිනි. එසේ අංජු විරුද්ධ පාර්ශ්වයන්ට එල්ල කරන තර්ජන නිසාවෙන් කිසියම් මොහොතක හෝ රොහාද අංජුගේ පාර්ශ්වයට ප්‍රතිප්‍රහාරයක් එල්ල කරමින් නැවතත් රත්මලානේ අළු යට ගිනි පුපුරනු ඇති බවට භීතියක් තිබේ.
මේ අපරාධ කල්ලි සාමාජිකයන් අතරින් ගෙවී ගිය දින කී‍පයේ උණුසුම් පුවතක් වාර්තා වූයේ ලසන්ත පෙරේරා හෙවත් අංගොඩ ලොක්කා පිළිබඳවයි. කඩුවෙල, අංගොඩ, මුල්ලේරියාව අවට පෙදෙස්හි පහත් බිම් ගොඩ කරමින් කප්පම් ලබා ගනිමින් පසුගිය කාල වකවානුවේ කොළඹ අවට ප්‍රබල ලෙස පාතාල අපරාධ ක්‍රියා සිදුකළ අංගොඩ ලොක්කා ඉන්දියාවේදී මියගිය බවට වාර්තා විණි.
මීට සති දෙකකට පමණ පෙරදී ලොක්කාගේ අනියම් බිරිය විසින් ඔහුට වස දී මරණයට පත්කර ඇති බවටත් එසේම හෘදයාබාධයකින් බැං‍ගලෝර් රෝහලකදී මියගිය බවට වාර්තා වුවත් එය නිල වශයෙන් බුද්ධි අංශ තහවුරු කර නොතිබිණි. මාකඳුරේ මධුෂ් සමඟ එක්ව 2017 පෙබරවාරි 27 වැනිදා කළුතර, එතනමඩලදී බන්ධනාගාර බස්රථයට වෙඩි පිට වෙඩි වරුෂාවක් එල්ල කරමින් එවකට පාතාලයේ ‘ගෝඩ් ෆාදර්’ වීමට මාන බලමින් සිටි රණාලේ සමයං ඇතුළු සයදෙනෙකු ඝාතනය කොට බෝට්ටුවකින් ඉන්දියාවට පලා ගිය අංගොඩ ලොක්කා එදින සිටම ඉන්දියාවේ විසුවේය.
මේ දිනවල පාතාල කල්ලි සාමාජිකයන් අතුරින් වැඩිම කතාබහට ලක්වන්නෙ කොස්ගොඩ තාරක පිළිබඳවයි. දකුණේ ප්‍රබලම අපරාධකාරයෙක් වන කොස්ගොඩ සුජී සමඟ එක්ව තාරක අපරාධ ලෝකයට අත්පොත් තබන්නෙ කොස්ගොඩ සිටි ප්‍රබල අපරාධකාරයෙක් වූ එස්.එෆ්. නදුන්ගේ ඇවෑමෙනි. නදුන් මේ වන විට ඉතාලියේ නිදහස් දිවියක් ගතකරන බවකි. සුජී සහ තාරක ගජමිතුරන් ලෙස කුඩා කල සිට හැදී අපරාධ ක්‍රියාවලට යොමු වුවත් පසුව නදුන් විසින් ඔවුන් දෙදෙනාගේ විරසකය ඇති කළේය.
මුල් කාලයේ බැංකු සහ මූල්‍ය ආයතන කොල්ලකමින් කොල්ලකරුවකු ලෙස කරළියට ආ කොස්ගොඩ තාරක මාතර නිලේඛා කොල්ලයේදී පොලිසියට කොටු විණි.
මෑතක සිට තාරක මත් ජාවාරමටද අත ගසා තිබෙන්නෙ මීට පෙරදී බන්ධනාගාරගතව සිටිද්දී හඳුනාගත් කොළඹ අවට අපරාධ කල්ලි සාමාජිකයන් හා එක්වයි.
පසුගිය මස 29 වැනිදා පොලිස් විශේෂ කාර්ය බළකාය විසින් හෝමාගමදී අත්අඩංගුවට ගැනුණු ගිනිඅවි තොගයද කොස්ගොඩ තාරකගේ බවට අනාවරණය වේ.
කොස්ගොඩ තාරක එම ගිනිඅවි භාවිත කරමින් බන්ධනාගාරගතව සිටින කංජිපාන ඉම්රාන් හෝ ප්‍රබල ගණයේ රැඳවියකුට ප්‍රහාරයක් එල්ල කිරීමටද සැලැසුම් කර සිටි බවකි.
එසේ එම ගිනිඅවි තොගය අත්අඩංගුවට පත්වීමට පෙර තාරක, කංජිපාන ඉම්රාන් ඇතුළු ප්‍රබල අපරාධකාරයන් කිහිපදෙනෙකු බූස්ස බන්ධනාගාරය තුළ කෑම වර්ජනයක් කර තිබුණේ ඔවුන්ව රඳවා තැබෙන විශේෂ කුටිවල සිටින කාලය අඩු කරන ලෙසටයි.
එම වර්ජනය පිළිබඳව සාකච්ඡා කිරීමට ගිය බන්ධනාගාර කොමසාරිස්වරුන් දෙදෙනෙකුට සහ සෙසු පිරිසට තාරක තර්ජනය කර තිබුණේ තමාගේ ජාලය එළියේ ක්‍රියාත්මක වන බවත්, ඕනෑතරම් ගිනිඅවිද තිබෙන බවත් බන්ධනාගාර නිලධාරින් ඝාතනය කරන බවත් පවසමිනි.
පොලිසිය අනාවරණය කරගෙන ඇති පාතාල කල්ලි 20ට අමතරව මත් ජාවාරමේ යෙදෙන ප්‍රධානම ජාලයක් මෙහෙයවන තැනැත්තා ලෙස වෙලේ සුදාද සැලැකේ. පොලිස් මත්ද්‍රව්‍ය නාශක කාර්යාංශ නිලධාරින් මත් ජාවාරම් උගුලේ පැටලීමේ තිරය පිටුපස පුද්ගලයා වෙලේ සුදා බවටද හෙළිවෙමින් තිබේ.
උපුටා ගැනීම – සිළුමිණ පුවත්පත
